من و نحنا صغار، تقريباً في عمر ال ٦ سنوات كان كل واحد فينا عنده تصور لايش يبا يصير لما يكبر، الي طيار، دكتور، مهندس، معلم…إلخ
تمر السنين و كل ما ننتقل لمرحلة جديدة نتمنى نوصل للي بعدها أسرع، و كنا نشوف ان بعد المرحلة الجامعية رح نرتاح، و رح نتوظف و يصير عندنا الراتب الي رح ننبسط و نعيش بيه
و أخيراً آخر اختبار جامعي يخلص، نستلم الوثيقة، و نرجع لموال كل واحد إيش و فين رح يشتغل، وظيفة حكومية، خاصة، أو عمل حر و في النهاية كل واحد يشوف طريقه
..لكن كلنا لسا يجمعنا شي واحد
،خلوني أرسملكم صورة ذهنية و عيشو معايا للحظة
بداية الشهر و أنت بترتب جدول أعمالك و بتستعد بأقوى ماعندك عشان تقدم الأفضل، يوم ورا يوم و أنت لسا بتكرف و تتعب، تشوف اعمالك و تفتخر بنفسك، عملائك بيقدروك و فريق العمل بيحترمك، و من مشروع لمشروع، و من عميل لعميل
.! بين يوم و ليلة، تصحى من النوم على رسالة وصلتك على جوالك، نعم يا عزيزي انه مسج السعادة
” تم إيداع مبلغ و قدره ***** على حسابك برقم “
يا أهلا بالحب و العصافير الي تغرد من الصباح و الجو الحلو و المود العالي ( طبعا يعتمد على كل واحد متى ينزل راتبه).
لكن!!!، و بعد ساعتين إلى ٢٤ ساعة من استلامه تصفقك الحقيقة المره على وجهك، و تجيك الرسايل الي تثبتلك انك شخص بالغ عاقل معتمد على نفسه و مكروف من الواقع
( عزيزي العميل، تم صدور فاتورتك بمبلغ و قدره #### الرجاء السداد في اقرب وقت ممكن …إلخ )
تمسك جهازك و تفتح الموقع الإلكتروني للبنك و تشوف الحساب البنكي، و تروح لسداد، و تدفع فواتيرك و أنت لسا تضحك للدنيا
بعدها بشويا و أنت عالغدا تجيك الوالدة الله يطول في عمرها(أو زوجتك الجميلة، أو حتى الدادة) ، و تقلك نبا مقاضي للبيت، و طبعا دحين أنا شخص مسؤول و لازم أخفف على الوالدة المصاريف، و يلا دا حق المقاضي
في الطريق للسوبرماركت، السواق يقول” مدام حسابك دا الشهر #####”، طبعاً للمعلومية، أنا لسا ما اسوق لأني خوافة، فا يا اطلبلي كريم أو أوبر، أو سواق المشوار الفنان الي بياخد نص الي بقي في حسابي، المهم حولنالو حقوقه و خلصنا مقاضي و رجعنا البيت، وقت الشاهي و التكاية، تعرف من قروبات الواتس أب أن فلان أو فلانة بيتزوجو و مو بس لازم توجب معاهم لا لازم تلبس احسن لبس و مو نفس الي لبستو في فرح الي قبلو لا ما يسير،أو مدري مين بيتخرج من الثانوي ولا الجامعة، و التاني جاتو ترقية مو زيك ، مدري مين جالو بيبي و التاني مرض و سوا عملية، هنا كل دول لازم توجب معاهم و تطفر و تدعي لحسابك و نفسيتك بالرحمة…
و مع دا كلو أنت لسا تبا تطلع و تنبسط و تروح البحر و ترفه عن نفسك، و يجوك الكارهين و يقولوك أنت بس تصرف فلوسك في اشياء مالها داعي ، أو دورلك وظيفة أحسن راتبها أعلى، وفوقها مو عاجبهم أسلوب حياتك و أنت كدا كلك على بعضك
لاحد يفهمني غلط، أنا إنسانة تحب الحياة، وتحب الأكل، و مقتنعة بحياتها، و ترتاح لما تنكرف في الشغل، و تنبببببسط لما تسعد وتدلع الناس الي يعزو عليها بهدايا، و مرا أحب احساس أني وصلت مرحلة أني اقدر أساعد ماما في شيلة البيت
ولكن في دي اللحظة، أتمنى أرجع ٢٠ سنة ورا، لما كان عمري ٦ سنين و كل همي لعبتي الجديدة، و عند مين من خالاتي رح أبات آخر الأسبوع، و متى يجي العيد عشان أعد كم حتوصل عيديتي، لما الدنيا كانت أسهل و الأهل و الاقارب كانت قلوبهم على بعض، أكتر من اهتمامهم بفرح مين كان أكبر، و بيت مين اوسع، و منصب مين أعلى، وفلانة متى و مييييين رح تتزوج، و مين رح تعزم طبعاً
صح صعب الواحد يكون شخص مسؤول عن نفسه و بيته و لازم يراعي الأهل و كلامهم عشا نحنا ( عيلة )، و لازم فوق كل دا ان يجمع لمستقبله أو يومه الأسود زي مايقولو، لكن ما تشوفو ان الحياة قصيرة؟
و ممكن في يوم ننام و ما نصحى؟
هل أنا عايشة لنفسي و لا عشان كلام الناس؟
هل صح أني أمشي ورا تقاليد مادية لمجرد ان ( لا عيب ما يسير إيش حيقولو )؟
هل أنا عايشة عشان في يوم اسوي خير في احد و يردلي هيا بأن يتكلم عليا و على اقرب الناس ليا و أنا بسوي بأصلي معاه و ما ارد عليه ؟
هل ممكن في يوم الحياة ترجع تصير أبسط من كدا زي زمان؟
هل حيجي اليوم الي الناس تكون قلوبهم على بعض أكتر من كلامهم في بعض؟
.هل هيا دي الحياة؟
Haneen Turkistany 